Programa

Gessuda de Barcelona estant | Orari de 9 h a 18 h

Era Val de Núria ei ua val pirenenca plaçada ena comarca deth Ripolhés. Se tròbe a ua nautor de 1.964 mètres sus eth nivèu dera mar, entornejada de tucs de lèu tres mil mètres, e ei solament accessible a trauès d’un tren cremalhèra o a pè.

Eth cremalhèra a un recorrut de 12,5 km e susmonte un desnivèu de mès de 1.000 mètres. Ena val, i a un lac artificiau e eth Santuari dera Mair de Diu de Núria. Era glèisa actuau s’inaugurèc er an 1911. Pòc dempús, s’i ahigec er otèl.

Era estacion de montanha Vall de Núria ei gerida per Torisme e Montanha de Ferrocarrils dera Generalitat de Catalonha. En iuèrn, era Val de Núria se convertís en ua estacion d’esquí de caractèr familhau. Ena prima, era tardor e er ostiu, era estacion compde damb autes activitats ludiques entà gaudir der entorn.

Aguesta visita s’inície damb gessuda de Barcelona estant e eth lòc de retorn serà Puigcerdà, a on se debanarà er EMC.

Gessuda de Puigcerdà estant | Orari de 9 h a 19 h

Eth Palhars Sobeiran ei ua comarca plaçada en còr des Pirenèus catalans e ei un destin fòrça apreciat pes aimants dera natura. Es sòns pòbles, damb era arquitectura tradicionau de pèira e tets de lòsa, gahen era esséncia d’aguest entorn. Ath delà, es activitats que s’i amien a tèrme, coma er esquí, es rotes de corsèra, era escalada o eth rafting, atrèn nombrosi visitaires, tant en ostiu coma en iuèrn.

Era visita de Puigcerdà se harà damb autobús e eth trajècte aurà ua durada d’ora e mieja apuprètz. En aguesta gessuda se visitaràn sustot iniciatives locaus, coma un negòci vinculat ath mon dera husta e era construccion, un chai que produsís vins de nautada o eth Musèu deth Pastor, a on mos parlaràn dera Escòla de Pastors e deth Parc Nacionau d’Aigüestòrtes. Dempús de dinar en un restaurant a on tastaram codina locau, visitaram eth pòble de Llessui.

Eth lòc de retorn serà Puigcerdà, a on se debanarà er EMC.

Gessuda de Puigcerdà estant | Orari de 8 h 30 a 14 h 30

Aguesta visita s’amie a tèrme especiaument entà membres de NEMOR e d’Euromontana, per çò que pera vrespada se debanaràn es assemblades de sòcis respectius.

Era Cerdanha ei ua comarca plaçada enes Pirenèus catalans, a uns 1.100 mètres de nautor e ena entèsta der arriu Segre. Se caracterize per èster ua comarca montanhuda damb ua plana nauta unica enes Pirenèus, compde tengut que non n’i a cap auta d’ua magnitud similara. Era capitau de comarca ei Puigcerdà, a on se desvolòpe er EMC2024.

Aguesta visita serà era mès cuerta, solament de maitin, e se gesserà de Puigcerdà. Se visitarà era farmacia de Llívia. Aguesta farmacia d’origina medievau, probablament era mès anciana conservada en Euròpa, siguec fondada tà començaments deth sègle XV. Ara a estat convertida en un musèu municipau. Dempús se visitarà eth Molí de Ger, a on s’elabòren hormatges damb lèit pròpria dera Cerdanha, e fin finau se visitarà er Otèl Cerdanha EcoResort en Prullans.

Eth lòc de retorn serà Puigcerdà, a on se debanarà er EMC.